Қўлимда қалам

     Мен ҳам бир нима ёзай, ҳамма ёзиб ётибди-ю, деб қўлимга қалам олишга олиб қўйдим-у, ўйланиб қолдим. Нима хақида ёзсам экан? Мавзу йўқлигидан ўйланиб қолмадим, аксинча, шу қадар кўп-ки, орасидан бирини танлаш ўйлантиради одамни.
     Хўш, бизда ҳамма нарса тескарилиги хақида ёзсаммикин?
     Аввал бирор ўқитувчи мажбурий меҳнатга жалб қилинган вақти ҳалок бўлади, кейин мажбурий меҳнатга қарши курашилади.
     Аввал уйига қайтаётган бизнинг ватандошларимиз билан тўлган автобус ёниб кетади, кейин авиабилетлар нархи арзонлаштирилади.
     Аввал газ баллонлари ўрнатилган машиналар портлаб, йўловчилар вафот этади, кейин текширувдан ўта бошлайди машиналар.
     Аввал бирор бир қурилиш режаси тузилади. Ҳамма дарахтлар кесиб олинади ана ундан кейин дарахтларни сақлаб қолиш чора-тадбирлари кўрилади.
     Аввал яққол монополист бўлган УзКард тўлов тизими ишида узилиш бўлиб, бутун халқ бир неча кун картадаги пулларини ишлатолмай қолади, кейин айтилади: "Хоҳлаганлар келсин, ишласин, биз монополист эмасмиз", деб.
     Ёзсаммикин шулар хақида?
     А йўқ, менга тинчлик керак. Ахир, бизда аввал тил, виждон, эътиқод эркинлиги кафолатлангани айтилади, кейин гапирганлар ўн беш кеча-кундуз йўқолиб қолишади-ку.
      Яхшиси, кейинги сафар, бирор бир яхшироқ нарса хақида ёзарман. Ўйлайманки, унча кўп кутишга тўғри келмайди. Унгача ҳаммамиз саломат бўлайлик.